Agfange hät das ganzi so:

Dä Gübi hät für de J+S Kurs, wo au a dem Wucheend in Kandersteg stattgfunde hät, sini Sprungusrüstig mitgnah. Am Sunntig nach em Elite Wettkampf isch dänn sini Chance cho. Und dänn bim Ässe i de Kabine hät die wunderbari Gschicht mit em Nici sim Comeback agfange.

De Elias seit zum Nici: "Hey Nici jetzt chöntisch doch au springe, wenn de Gübi springt."Und de Nici ganz troche „han keis Kombi"..."chasch mis ha." De Nici lacht, „da pass ich nie drih, da müesst ich scho es Kombi vom Tim Hug ha". Tja Nici das hettisch nöd sölle säge. Dänn scho sind de Elias und de Leon los gspurtet, villicht isch er ja na da, de Tim. Sie händ en au gfunde, aber leider hät er d Kombis scho im Hotel gha. En Kandersteger hät das Gschpräch aber mit becho. „Für wer sueched ihr es Kombi?" „Für euse Trainer de Nici." Und scho sinds im Kandersteger Container gstande, wos ganz viel Material gha hät. So händs zwei Kombis usgläse und sind zu de Athletecontainer gspurtet. Ja dänn Nici, jetzt muesch ilaufe. D Schueh und Ski händs der au organisiert. De Gübi hät de Nici na bi 4 Imitatione gfange. Es chunt guet. – oder doch nöd? Bim umzieh hät de Riverschluss vom Kombi eifach nöd zue ga welle. Und s zweite Kombi hät au gar nöd passt…Aber kei Sorg, scho sind zwei Chind wieder los gspurted und händ es Kombi bracht, wo passt.

Jetzt gits keis zrugg meh….D Athlete händ de Container langsam verlah, springt er würklich? Dänn sinds use cho...de Nici und de Gübi und mit entschlossne Schritt zum Lift gloffe. Die Chline sind alli scho gsprunge und händ im Uslauf gspannt gwarted...springt er würklich...wie guet chan ers.

Dä Nici hockt uf de Balche (ok s'isch chli länger gange) Gaht id Position und springt ab. Unglaublich. Bi de Landig händ d Athlete gjubled und klatsched, mer hets bis uf Kandersteg ghört. De Nici muen churz i sich gah. Packt sini (also am Elias) sini Ski und lauft wieder zum Lift. Dobe wird er vo de Athlete zue texted...wänn gasch uf die Gross und und und. Alli sind so ufgregt gsih. De Martin, euse „Trainer in verträttig" hät denn mit ganz glänzige Auge und eme riese Strahle im Gsicht e churzi knackigi Korrektur gäh. Und wieter ischs gange. Am Schluss bisch uf 66 Meter gsprunge, de Berni Chef Skisprung häts gseh und gmässe.

NICI mir sind mega stolz uf dich, ich bin stolz ufs Team. Chind ihr händ das super gmacht. De Bachtel Spirit isch voll uf de Nici übergschwapt, er hät nümme retour chöne.

Mir alli werded de Sunntig-Mittag nie vergässe.

Danke Nici

Sara 25.10.2016